«İdman Azərbaycan» ölkə idmanını dünyaya tanıdan kanaldır
Müstəqil Azərbaycanın sosial-iqsitadi inkişafı digər sahələrin də
inkişafına ciddi zəmin yaratdı. Xüsusən də, Azərbaycan dövlətinin, ölkə
başçısı İlham Əliyevin həyatın bütün sahələrinin inkişafı üçün
məqsədyönlü siyasət yeritməsi Azərbaycanın hazırda dünyanın inkişaf
etmiş ölkələri arasında özünə layiqli yer tapmasına şərait yaradıb.
Təbii ki, Azərbaycanda mövcud olan mövcud siyasi vəziyyət, stabillik,
iqtisadi artım inkişafı zəruri edən amillərdəndir. Uzun illərdən bəri
sübut olunmuş bir məfhum var – İdman və bədən tərbiyəsi hər bir ölkənin
beynəlxalq aləmdə tanınması, nəslin sağlam inkişafı üçün önəmli
vasitələrdən biridir. Məhz bu səbəbdən də Azərbaycan dövləti idmanın,
xüsusilə də olimpiya hərəkatının inkişafına xüsusi diqqət yetirir.
Azərbaycan prezidenti, Milli Olimpiya Komitəsinin prezidenti İlham
Əliyevin bu sahəni sevməsi, idmançıların qayğı və problemləri ilə
yaxından maraqlanması ölkədə idmanın kütləviləşməsinə, gənc nəslin bu
sahəyə sürətli axınına şərait yaradıb. Təbii ki, bunun üçün
Azərbaycanda lazımı maddi-texniki baza da yaradılıb. Çünki ölkəmizdə
xüsusilə son 10 ildə tikilən olimpiya idman kompleksləri, təlim-məşq
bazaları məhz gənc və usta idmançılara, idmanın inkişafına xidmət edir.
Azərbaycanın idman sahəsində qazandığı nailiyyətlər, dünya və Avropa
çempionatlarında idmançılarımızın qazandığı medallar və mükafatlar
ölkəmizin beynəlxalq idman təşkilatlarında da mövqeyinin xeyli
güclənməsinə səbəb olub və Azərbaycanı dünyaya əsl idman ölkəsi kimi
tanıdıb. Məhz bu səbəbdən də beynəlxalq idman ictimaiyyəti, idman
federasiyaları həvəslə ən mötəbər yarışları ölkəmizə həvalə edir, Bakı
və eləcə də digər şəhərlərimiz bu yarışları yüksək səviyyədə təşkil
edərək Azərbaycanın bu sahədə dünya liderləri sırasında olduğunu
göstərirlər.
Təbii ki, İDMAN SAHƏSİNDƏ əldə olunan bu uğurlu nəticələr bu sahə ilə
məşğul olan spesifik bir televiziya kanalının yaradılmasını zəruri
edirdi. Məhz bu zərurətdən 2009-cu il fevralın 1-də İdman Azərbaycan
kanalı rəsmən fəaliyyətə başladı. Ölkə prezidenti İlham Əliyevin şəxsi
təşəbbüsü ilə yaradılan kanal televiziya sahəsində böyük təcrübəyə
malik Azərbaycan Televiziya və Radio verilişləri QSC-nin nəzdində
yaradıldı. Bununla bağlı Teleradio Şurasının keçirdiyi tenderdə qalib
gələn Azərbaycan Televiziyası tez bir zamanda kanalın
formalaşdırılmasına başladı. Yayımın yüksək səviyyədə təşkil olunması
üçün telekanalın daxilində olan peşəkar kadrlardan istifadə olunmaqla
yanaşı, kənardan da yeni mütəxəssislər işə cəlb olundu. Beləliklə gənc
və enerjili bir kollektivlə fəaliyyətə başlayan İdman Azərbaycan qısa
bir zamanda Azərbaycan idmanının güzgüsünə çevrildi. Bu müddət ərzində
həm Avropanın aparıcı ölkələrinin futbol çempionatlarının, eyni zamanda
müxtəlif idman növləri üzrə beynəlxalq yarışları efirdə yayımlanması
üçün müqavilələr imzalandı. Təsadüfi deyil ki, bu gün adi idman
azarkeşi İdman Azərbaycanda müxtəlif idman növləri üzrə hər zövqə uyğun
yarışı izləyə bilər. Futbol üzrə, İspaniya, İngiltərə və Almaniya
çempionatlarının oyunları, Amerika Milli Basketbol Assosiasiyasının
qarşılaşmaları, voleybol üzrə çempionlar liqası, güləş, cüdo, boks üzrə
dünya, avropa çempionatları və digər beynəlxalq yarışlar, heç bir maddi
vəsait ödəmədən, şifrəsiz tamaşaçılara təqdim edilir ki, belə bir
tendensiya nəinki MDB-də hətta dünyanın heç bir ölkəsində müşahidə
olunmur. Çünki hazırda televiziya, xüsusilə də idman oyunlarının
teleyayımı əsasən kommersiya xarakteri daşıyır və bir çox ölkələrdə
həmin yarışları məhz müəyyən məbləğdə pul ödəməklə izləmək mümkündür.
Azərbaycanda isə belə nüfuzlu yarışların şifrəsiz və təmənnasız
göstərilməsi məhz ölkəmizdə dövlət səviyyəsində idmana və olimpiya
hərəkatının inkişafına göstərilən diqqət və qayğının nümunəsidir.
Şübhəsiz ki, telekanalın əsas prioriteti Azərbaycan idmanıdır. Bu
baxımdan da İdman Azərbaycan kanalı ilk növbədə ölkə idmançılarının
iştirakı ilə keçirilən yarışlardan həm canlı yayımlar təşkil edir, həm
də bu nüfuzlu turnirlərlə bağlı xüsusi verilişlər hazırlayır. Üstəlik,
son illər Azərbaycanın ard-arda nüfuzlu beynəlxalq yarışlara
təşkilatçılıq etməsi kanalın məsuliyyətini birə-beş artırıb. Təsadüfi
deyil ki, yarandığı gündən bəri telekanal güləş üzrə Qızıl qran-pri
turnirini, Cüdo üzrə qran-pri turnirini, qılıncoynatma üzrə gənclər və
yeniyetmələr arasında dünya çempionatını, taekvando üzrə Avropa
kubokunu, Kikboksinq üzrə Avropa çempionatını, otüstü xokkey üzrə
beynəlxalq turnirləri, boks üzrə dünya seriyasını və digər mötəbər
yarışları canlı yayımlarla işıqlandırıb.
İdman Azərbaycan telekanalı həm də Azərbaycan futbolunun geniş
təbliğatçısıdır. Bu mənada futbolla bağlı layihələrldə ölkə prezidenti
İlham Əliyevin 2005-2015-ci illərdə futbolun inkişafı ilə bağlı təsdiq
etdiyi dövlət proqramını əsas götürən telekanal futbol üzrə Azərbaycan
çempionatında bir çox klubların oyunlarını, həmçinin Milli komandamızın
qarşılaşmalarını canlı yayımlayır.
Telekanalın həftəlik proqramında rəngarəng və müxtəlif mövzuda olan
verilişlərə də geniş yer ayrılıb. Hazırda hər gün 3 saatdan bir efirə
verilən xəbər buraxılışlarından əlavə «İdman həftəsi», «Arena»,
«Premyer Liqa», «Avrofutbol», «Tay-brek», «İdman ensiklopediyası»,
«Flaqman», «Güləş Aləmi», «Olimp», «İdman ölkəsi», «İdman sağlamlığın
rəhnidir» kimi verilişlər efirə çıxır. Əlavə olaraq tamaşaçılar
həftəlik boks telejurnallarını, «Qoalissimo» adlı futbol jurnalını,
Almaniya, İngiltərə və İspaniya çempionatlarının icmallarını da izləmək
imkanı əldə edirlər.
İdman Azərbaycan kanalı hazırda peyk vasitəsilə dünyanın bir çox
ölkələrinə yayımlanır. Yəni istər xaricdə yaşayan həmyerlilərimiz,
istərsə də bu ölkələrin əhalisi Azərbaycan idmanı haqqında, ən mötəbər
turnirlərdəki uğurlarımızı da məhz adıçəkilən telekanalın efirindən
izləməklə, ölkəmizdə bütün sahələrdə olduğu kimi idman sahəsində də
gedən inkişafın şahidi olurlar.
Fəaliyyətində peşəkarlığı, operativliyi və ən əsası daima inkişafı əsas
götürən «İdman Azərbaycan» telekanalının kollektivi gələcəkdə də
yeni-yeni layihələrlə idmansevərləri sevindirməyə çalışacaq. Bunun üçün
əməkdaşlara hər cür şərait yaradılıb. Onlar hazırda ən müasir texniki
avadanlıqlardan, müasir studiyalardan, rəqəmsal telekameralardan, ən
son texnologiya ilə təchiz olunmuş səyyar televiziya studiyalarından
istifadə edirlər. Təbii ki, telekanalın əməkdaşlarının, istər yaradıcı,
istər texniki sahədə olsun öz səviyyələrini artırmaları üçün də işlər
görülür, efirin həcmi artdıqca buraya yeni işçilər, xüsusilə də gənc və
perspektivli kadrlar cəlb olunur.
Fevralın 1-də İdman Azərbaycan kanalının 2 yaşı tamam oldu. Geridə
qalan vaxt ərzində Azərbaycan idmanının təbliğinə xidmət edən, ölkə
idmanının və idmançılarının uğurlarını bütün dünyaya çatdıran telekanal
Azərbaycanda olimpiya hərəkatının təbliğinə də öz töhvəsini
verməkdədir. Təbii ki, bundan sonra da İdman Azərbaycan bu prinsiplərə
sadiq qalacaq.